Home
દેશ-વિદેશ
ટ્રમ્પે ભારત પર એક્સ્ટ્રા 25% ટેરિફ નાખતા હવે કુલ ટેરિફ 50% થશે, 27 ઓગસ્ટથી લાગુ : રશિયન તેલ ખરીદવાથી નારાજ અમેરિકન રાષ્ટ્રપતિ

ટ્રમ્પે ભારત પર એક્સ્ટ્રા 25% ટેરિફ નાખતા હવે કુલ ટેરિફ 50% થશે, 27 ઓગસ્ટથી લાગુ : રશિયન તેલ ખરીદવાથી નારાજ અમેરિકન રાષ્ટ્રપતિ

08:55 PM August 06, 2025 Gujju News Channel

અમેરિકાના રાષ્ટ્રપતિ ડોનાલ્ડ ટ્રમ્પે રશિયા પાસેથી તેલની ખરીદી મુદ્દે ભારત પર વધુ 25% ટેરિફ લાદવાનો આદેશ આપ્યો છે. આ નવા ટેરિફ સાથે ભારતીય ઉત્પાદનો પર કુલ 50% ટેરિફ લાગુ થશે. ત્યારે આ નિર્ણયના કારણે ભારત અને અમેરિકા વચ્ચેના વેપાર સંબંધોમાં તણાવ વધવાની શક્યતા છે.

American President Donald Trump Imposes 50 Percentage Tariff On India : અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર ભારત પર ટેરિફનો મોટો આદેશ જારી કર્યો છે. રશિયા પાસેથી સતત તેલની ખરીદીને કારણે ભારતીય ઉત્પાદનો પર વધુ 25% ટેરિફ લાદવાના એક્ઝિક્યુટિવ ઓર્ડર પર ટ્રમ્પે હસ્તાક્ષર કર્યા છે. આ નવા ટેરિફ સાથે હવે ભારત પર કુલ 50% ટેરિફ લાગુ થશે.

► ટ્રમ્પના નવા આદેશમાં શું કહેવાયું?

અમેરિકાના રાષ્ટ્રપતિ ડોનાલ્ડ ટ્રમ્પે ભારત પર વધારાનો 25% ટેરિફ લાદવાના આદેશ પર હસ્તાક્ષર કર્યા છે. આ નિર્ણયનો આધાર 2022માં યુક્રેન પર રશિયાના હુમલા બાદ જાહેર કરાયેલી રાષ્ટ્રીય કટોકટી છે. જેમાં અમેરિકાએ રશિયન તેલની આયાત પર પ્રતિબંધ મૂક્યો હતો. ટ્રમ્પે જણાવ્યું કે ભારત આ પ્રતિબંધને અવગણીને રશિયા પાસેથી તેલ ખરીદી રહ્યું છે. જેનાથી રશિયાને આર્થિક મદદ મળી રહી હોઇ આ જ કારણોસર ભારત પર આ ટેરિફ લાદવામાં આવ્યો છે.

► ટેરિફ ક્યારથી લાગુ થશે ?

ટ્રમ્પે સહી કરેલા આ આદેશ અનુસાર આ નવા ટેરિફ 27 ઓગસ્ટ 2025થી અમલમાં આવશે. આ તારીખ પછી અમેરિકા મોકલવામાં આવતા તમામ ભારતીય માલસામાન પર આ ડ્યુટી લાગુ થશે. જોકે જે માલસામાન આ તારીખ પહેલા રવાના થયો હોય અને 17 સપ્ટેમ્બર 2025 પહેલા અમેરિકા પહોંચી જાય તેને આ ડ્યુટીમાંથી મુક્તિ મળશે. આ વધારાનો ટેરિફ અન્ય તમામ ડ્યુટી અને કર ઉપરાંત હશે.

► આ નિર્ણય પાછળનું કારણ શું છે ?

અમેરિકાના રાષ્ટ્રપતિ ડોનાલ્ડ ટ્રમ્પે આ આદેશનું કારણ ભારત દ્વારા રશિયા પાસેથી સતત થઈ રહેલી તેલની ખરીદી ગણાવ્યું છે. અગાઉ પણ, અમેરિકાએ આ જ મુદ્દે ભારત પર 25% ટેરિફ અને દંડની જાહેરાત કરી હતી. હવે તેમાં વધુ 25% નો વધારો કરવામાં આવ્યો છે.

► રશિયન તેલની વ્યાખ્યા અને આદેશની કાનૂની જોગવાઈઓ

અમેરિકાના રાષ્ટ્રપતિ ટ્રમ્પે જારી કરેલા નવા આદેશમાં રશિયન તેલ બાબતે સ્પષ્ટતા કરવામાં આવી છે કે માત્ર રશિયાથી સીધા નિકાસ થયેલું તેલ જ નહીં પરંતુ રશિયામાં ઉત્પાદિત કોઈપણ તેલ કે પેટ્રોલિયમ ઉત્પાદન જે ભારત ત્રીજા દેશ મારફતે ખરીદે છે તેને પણ આ પ્રતિબંધમાં સામેલ કરવામાં આવશે. આ જોગવાઈનો ઉદ્દેશ કોઇ પણ રીતે થતી રશિયન તેલની ખરીદી પર પણ પ્રતિબંધ મૂકવાનો છે.

► અન્ય દેશો પર પણ અસર ?

ટ્રમ્પે સંકેત આપ્યો છે કે જો કોઈ અન્ય દેશ રશિયા પાસેથી સીધી કે આડકતરી રીતે તેલની આયાત કરશે તો તેની સામે પણ આવી જ કાર્યવાહી થઈ શકે છે. જોકે આ આદેશમાં એવી પણ સ્પષ્ટતા કરવામાં આવી છે કે જો રશિયા અથવા અન્ય કોઈ અસરગ્રસ્ત દેશ અમેરિકાની નીતિઓ અનુસાર પગલાં લેશે તો આ ટેરિફમાં ફેરફાર પણ થઈ શકે છે. આ નિર્ણયથી ભારત અને અમેરિકા વચ્ચેના વેપારી સંબંધોમાં તણાવ વધવાની શક્યતા છે અને ભારતીય નિકાસકારો પર તેની ગંભીર અસર પડી શકે છે.